SIGUBHA LULWIMI LWEMDZABU
Sir,
Lusuku lwelulwimi lwemdzabu lugujwa mhlaba wonkhe ngenyanga yeNdlovana mhla tingemashumi lamabili nakunye. Inhloso yekugubha lolusuku kutfutfukisa lwati nekukhanyisela bantfu ngebumcoka bekujula belulwimi nemihambo nemasiko.
Kusungulwa kwekugujwa kwalelilanga lwelulwimi lwemdzabu kwacala kulela laseBangladesh emva kwekubulawa kwebafundzi labebangenele umbhikisho balwela kukhuluma lulwimi lwabo lwemdzabu ngemnyaka wa1952. Kushona kwalabafundzi labalwela kukhuluma ngelulwimi lwabo lwemdzabu sekukhunjulwa mhlabawonkhe.
Kucala kugubha lolusuku kwaba ngemnyaka wa2000, Indlovana 21.
Ingcikitsi
Ngemnyaka ngemnyaka kuba nengcikitsi lebekwa nguMhlabuhlangene kugubha lolusuku. Kulomnyaka wa2019 ingcikitsi itsi ‘Tilwimi Temdzabu Tingumgogodla Wentfutfuko, Kuthula Nekubuyisana’.
Akungabateki kutsi lulwimi lumcoka kubantfu ngoba luyindlela yekuchumana kwebantfu, kwesive nemhlaba wonkhe. Ngaphandle kwelulwimi bantfu bangaba nebulukhuni bekuchumana, kuvana nekuphila. Lulwimi ngulo lolusitjela kutsi umuntfu ngamunye ngamunye wekudzabuka kuliphi live.
Lulwimi lusipho lesivela kuNkulunkulu. Ngulona lolwehlukanisa umuntfu kulenye indalo yaNkulunkulu. Kutfutfuka kwemave kucondzene ngco nekubeni khona kwelulwimi. Lulwimi angeke saluhlukanisa nebantfu labalukhulumako. Ngaphandle kwesive lulwimi angeke selube khona. Lulwimi luyakhula lundlondlobale ngekukhula kwesive.
Kuyavela kutsi nchanti umhlaba usacala bantfu bebakhuluma lulwimi lunye. Kungumanje tilwimi letikhona tiyendlula etinkhulungwaneni letisihlanu mhlabawonkhe. Lokuyimvisa buhlungu kutsi ngemnyaka tilwimi temdzabu letingemashumi lamabili nesihlanu tiyalahleka. Kungako kumcoka kutsi sisive semaSwati silujubelele lulwimi lwetfu ngoba luyinsika yelive. ‘Khumbula kulahlekelwa lulwimi kulahlekelwa buve bakho’.
Ibhalwe nguESSTA abambisene naMOET
Comments (0 posted):